سؤال لازم كلنا نسأله لنفسنا . هل ردينا الجميل ؟
كل حد مننا علشان يكبر ويتعلم ويبقى بالشكل ال وصله دلوقتي ناس كتير تعبت و ساعدته انه يبقى كده .
اب وام تعبوا و سهروا جنبك لحد اما كبرت وحرموا نفسهم من حاجات كتير علشان انت ما تتحرمش من حاجة .
اخوات كانوا دايما جنبك و سند ليك .
مدرس ومدرسة تعبوا علشان يعلموك و يساعدوك على ادراك كل شئ حواليك و اولهم ادراك نفسك وانت ايه وعايز تبقى ايه .
اصحاب كانوا دايما جنبك ووقت الشدة بتلاقيهم في ضهرك .
بلد وفرت لك كل السبل المتاحه علشان تبقى انت . وقبل ما اي حد يعترض انا قولت كل السبل المتاحه لان لو في حاجه اكتر من كده في الامكان كانت هتوفرها لك بالتأكيد .
طب تعالي بقى انت كبرت ساعدت حد اصغر منك ؟
انت اتعلمت وفهمت حاجات كتير في الدنيا حاولت تفهم حد ما اتعلمش وتساعده انه يفهم زيك ؟
طب عملت ايه لأهلك و عيلتك ال كانوا دايما جنبك ؟
انت اخر مرة سألت عن مدرسينك امتى او روحت مدرستك تشجع الاطفال الصغيرين انهم يتعلموا علشان يبقوا احسن ؟
طب اخر مرة تطوعت في عمل تطوعي بجد يفيد الناس والمجتمع ال حواليك ؟
ده اسمه رد الجميل ال المفروض تعمله . سوا انت راضي عن حياتك تعليمك او عن المجتمع ولا لا . لان ال انت مش راضي عنه ده غيرك بيتمنى يوصل لنصه .
سواء بعد دراستك اشتغلت ولا لسه ، انت اعمل ال عليك وساعد غيرك هتلاقي ربنا بيساعدك .
رد الجميل للناس ال وصلتك لنفسك وللبلد قبل ماتطلب بحياة افضل .