من فترة كنت بدور على محل ساعاتي علشان يغير لي حجر الساعه فوجئت ان حي بالكامل مفيش فيه ساعاتي . استغربت ازاي كده . ده زمان كان كل منطقة فيها كل الخدمات ال بيحتاجها سكان المنطقه . ساعاتي . محل احذية . محل تصليح اجهزة كهربائية . وحاجات تانية كتير ، راحه فين كل الخدمات دي وازاي احنا مالاحظناش انها اختفت ، فوجئت ان كل المحلات دي اتحولت لميني ماركت او سوبر ماركت .
هل اصبحنا مستهلكين لدرجة اننا حولنا الدنيا من حوالينا لماركت كبير ونسينا اننا محتاجين خدمات تانية غير الاكل والشرب .
اه معاكم ان مشروع السوبر ماركت العائد بتاعه سريع و ارباحه عالية، بس لما كلنا نقفل نشاطاتنا و نتحول للمكسب السريع هنجيب حد غريب يقدملنا خدماتنا ؟
و اكيد مش كلنا هنشتغل في مكاتب وشركات وننسى ان اي بلد تقدمها بيكون بالايد العاملة . والمقصود هنا مش بس عمال المصانع والشركات . احنا كلنا ايدي عاملة في مجاله ، ومفيش حاجه اسمها مهنه كبيرة ومهنة بسيطه .
ممكن جدا المهنه البسيطه ال حضرتك بتبصلها بنظرة تعالي . تكون اهم للمجتمع من مهنه قيادية.
طب تخيل معايا كده عامل النظافة لو بطل يشتغل مين هيقوم بأعظم وظيفه هي نظافة بيوتنا و شوارعنا من مخلفتنا .
طب تخيل معايا اننا انعزلنا تكنولوجيا والموبايلات والستالايت واللاب وغيرها اصبح قطعه خردة ومفيش وسيلة لتحديد الوقت الا بالساعات اليدوية ومفيش ساعاتي يضبط تشغيلها .
طب تخيل تاني ان عمال النقل توقفوا عن عملهم انت هتروح عملك ازاي .
تخيل كده لو مهن كتير كده من ال انا وانت وغيرنا كتير قررنا مانشتغلهاش وجه الوقت ال مايبقاش حد شغال فيها هنعمل ايه ؟
الشغل اليدوي او الحرف البسيطه زي ما البعض بيسموها شئ اساسي لاستمرار البلد علشان كده لازم نهتم بتوعية الناس بضرورة واهمية التعليم الفني . والا هنصحى في يوم ندور وعلى لسانا سؤال واحد ( اين ذهب هؤلاء ؟ )
