كتب دكتور / جمال شعبان
استشاري امراض القلب
عميد المعهد القومي للقلب ( سابقا)
حشيش العيد…
🎯 ٣ أيام العيد ١٣ حالة طوارئ جلطة حادة في القلب بينهم عامل مشترك إن معظمهم من الشباب والشباب بينهم كلهم عامل مشترك واحد وهو الحشيش أو (حشيش العيد ) كما يقولون .
🎯 الحالة رقم ١٤ كانت لشاب معندوش أي عوامل خطوره قصته بدأت من ٤ أيام بصعوبة بالتنفس وراح لمستشفى……. وقعد فيها ٤ أيام وهو بياخد مدرات للبول لحد ما حصل له نقص في البوتاسيوم وفى اليوم الرابع هرب من المستشفى و جالنا ومع أول فحص ليه بالموجات الصوتية للقلب لقينا ارتشاح شديد في الغشاء التاموري تسبب فى هبوط كافة العلامات الحيويه وعدم استقرار درجة وعى المريض وعلي طول دخلنا بيه القسطرة وتم عمل بذل للغشاء التامورى أول مرة سحبنا حوالى ٦٠٠ مل حتى تحسنت العلامات الحيوية وبدأ المريض يعود لطبيعته و بدأنا مرحلة البحث والتحليل عن الأسباب.
🎯 و قبل ما نخلص كنا بدأنا نجهز لدخول مريض آخر عنده جلطة بالقلب سنه ٢٨ سنه وما فيش أي علامات خطورة غير الحشيش وللاسف الشرايين كانت سيئة جدا لا تتناسب مع سن المريض مع انخفاض كفاءة القلب
🎯 والشاب الاخير كان عنده ٣٢ سنه راح مستشفى …. وتم خروجه علشان رسم القلب و إنزيمات القلب كانوا كويسين ومع أول رسم قلب كان فيه جلطة حادة بالقلب و ST elevation in avR ولما دخلنا القسطرة كان الشريان الأيسر الأمامي النازل ماكنش ظاهر ليه أي ملامح لدرجة إننا تخيلنا إنه مفيش ( LAD ) لكن بفضل الله وبدعم ومساعده زملائي في فريق قسم القلب في مستشفى الزيتون التخصصى تمت المهمة بنجاح وتم العثور علي الشريان المفقود و توسيعه وتركيب دعامة الحياة لهذا المريض .
👌 الملاحظ هنا إن معظم الحالات من الشباب ومعظم الشباب لا توجد لديهم أي عوامل خطورة ( سكر أو ضغط أو غيره) ولكن يجمعهم عامل مشترك واحد هو الحشيش
إذن الأمر يستحق الدراسة والحذر والتنبيه
والفاست فود والحلويات والسكريات كمان
حفظ الله قلوبكم جميعا …
