زين الدين جمعه يكتب……الكلمه الحلوه وتاثيرها

داخل السوبر ماركت من شوية .. اشترى شوية حاجات للبيت .. لفت نظرى موقف بيحصل .. واقف ادامى راجل ومعاه واحدة ست واضح انها مراته .. الست شارية حاجات كتير .. سكر وزيت ورز وغيره من لوازم البيت .. المهم جوزها واقف يبص للحاجات دى ويبص لها بغضب وزعل ممكن يخوف العيال الصغيرة فى الشارع !! .. الراجل كمان واضح انه مش نايم كويس .. وشه مرهق جدا وعنيه حمرا من قلة النوم !! .. الست مشغولة بالاكياس اللى فى ايدها وعمالة تحسب فى الحاجات كفاية ولا لا !! .. وهو واقف مافيش كلمة غير نظرات غضب ونفس مستمر اللى هو هانخلص امتى بقى وهحاسب ازاى على كده !! .. فجأة الست اتلفت له .. وقالت له .. معلش انا عارفة انى متقلة عليك جداا .. وعارفة انك لسه راجع من شغلك ومش نايم طول الليل .. بس فعلا البيت فاضى .. و اكيد لما تصحى هاتبقى محتاج فطار ومحتاج تكون فى جو هادى قبل ماتنزل شغلك وماينفعش ساعتها اطلب منك حاجة .. ثم مين هايجيب لينا غيرك .. ربنا يخليك لينا وتفضل فاتح بيتك وعلى راسنا دايما !! .. بعد الكلمتين دول .. الراجل نظرات الغضب اتحولت .. الوش اللى كان مرهق فتح .. العنين الحمرا بقت بتلمع !! .. وكلمتين اللى قالهم يخليكوا ليا انتى والاولاد وبعد ماكان عاوز يهرب زى القاتل اللى خايف من جريمة .. بقى يسأل لها محتاجة حاجة تانية ولا كده خلاص .. وخلى بالك فيه الاسراء والمعراج .. شوفى بتحبى حلاوة المولد ايه وماتنسيش الاولاد بيحبوا السمسم والفولية !! .. الفكرة هنا فى ايه ؟؟ الكلمة الحلوة .. بتغييير كل شىء .. لو كانت الست دى بصت له وخبطته كلمتين من نوعية هو انت كل ماتخرج معايا منكد عليا وعلى نفسك .. البيت فاضى اعملك ايه ما انت لو مهتم كنت عرفت .. مش هاصرف عليك انا وعلى ولادك .. فك بوزك ده شوية وكفاية الناس بتبص علينا !! .. اكيد الوضع كان بقى سىء جدااا .. انما الكلمة الحلوة .. اد ايه ممكن تغير مشاعر سيئة واد ايه ممكن تبدل حال دايما للاحسن .. الكلمة الحلوة بتفتح قلوب ونفوس وبتخلى الدنيا احلى